Link copied!
Sign in / Sign up
7
Shares

तुम्ही गरोदर आहात आणि विसराळु झाला आहात का ?


गर्भवती असणाऱ्या ५० ते ८० % स्त्रिया विसराळूपणा किंवा गोष्टी लक्षात न राहणाची तक्रार नोंदवतात. त्यांना एखाद्या गोष्टीवर नीट लक्ष केंद्रित करता येत नाही असे त्यांचे म्हणणे असते. या स्थितीस ‘ प्रेग्नेन्सी ब्रेन’ असे म्हणतात. गरोदरपणातील विसराळूपणास प्रोजेस्टेरोन आणि इस्ट्रोजन ही दोन संप्रेरके कारणीभूत असतात. या संप्रेरकांच्या पातळीतील अचानक झालेली वाढ तुमच्या लक्षात ठेवण्याच्या क्षमतेवर परिणाम करते. यात झोपेची कमतरता आणि गरोदरपणात येणारा थकवा यांची भर पडल्यामुळे लक्ष केंद्रित करणेही सहज शक्य होत नाही. काही तज्ञांच्या मते गरोदरपणाच्या शेवटच्या त्रैमासिकात मेंदूच्या पेशींची घनता संकुचित होते तेंव्हा प्रेग्नेन्सी ब्रेनमुळे विसरभोळेपणा वाढतो. हे कायमसाठी नसते. प्रसुतीनंतर मेंदू पुर्ववत काम करायला लागतो त्यामुळे याविषयी चिंता न करता खालील काही गोष्टी करा ज्या तुम्हाला काही प्रमाणात मदत करतील.

१. गोष्टी लिहून ठेवा.

एखादी गोष्ट लक्षात ठेवण्यासाठी सर्वात चांगला उपाय आहे की ती डोळ्यासमोर असावी. तुमच्या महत्वाच्या गोष्टींची यादी किंवा नोट भिंतीवर, फ्रीजवर किंवा दिसेल अशा ठिकाणी चिटकवून ठेवा. तुमच्या नेहेमी वापरायच्या वस्तू जागा न बदलता योग्य जागेवर ठेवा. म्हणजे शोधताना लगेच सापडतील. तुमच्या गोष्टींचे नियोजन करणे आणि लिहून ठेवणे तुम्हाला खूप मदत करेल.

२. पूर्ण झोप घ्या.

मेंदूच्या चांगल्या कार्यक्षमतेसाठी झोप अत्यावश्यक आहे. दररोज किमान ८ तास झोप घेणे तुमच्यासाठी गरजेचे आहे. अर्धवट झोपेमुळे अनेक समस्या निर्माण होऊ शकतात. शरीराच्या सर्व क्रिया व्यवस्थित पार पडण्यासाठी शरीराची झीज भरून निघणे देखील गरजेचे ठरते. म्हणून पूर्ण झोप घ्या.

३.गोंधळून जाऊ नका.

गडबडून जाणे आणि त्या गोष्टीचा ताण घेणे यात काहीच अर्थ नाहीये. तुमच्या विसरभोळेपणाला कारण आहे त्यामुळे शांत राहा. तुम्हाला आवडणाऱ्या गोष्टी करत राहा. एखादे पुस्तक वाचणे, गाणी ऐकणे किंवा तुमची आवडती डीश बनवणे अशा गोष्टीत स्वतःला रमवून घ्या . टेन्शन घेऊन आणि इतरांवर त्रागा करून काहीच साध्य होणार नाही. मन शांत ठेवण्यास प्रयत्न करा.


४. ओमेगा ३ चे सेवन.

ओमेगा ३ असणाऱ्या अन्न पदार्थांचे सेवन करा. ओमेगा ३ मेंदूच्या कार्यक्षमतेसाठी खूप लाभदायी असते. प्रेग्नेन्सी-सेफ-मासे, जवस किंवा DHA जास्त असणाऱ्या अन्नपदार्थांमध्ये ओमेगा ३ असते. याच्या सेवनाने बाळाच्या मेंदू विकासात देखील मदत होते. परंतु हे डॉक्ट्रांच्या  सल्ल्याशिवाय घेऊ नका. 

५. गोष्टी सोप्या करा.

आधी सांगितल्याप्रमाणे कोणत्याही गोष्टीचा ताण घेणे टाळा. तुमच्या या विसराळूपणाचा दोष तुम्ही तुमच्या हार्मोन्सवर टाकू शकता. तुमच्या कोणत्याही मूर्खपणाच्या साध्या साध्या चुकांसाठी हार्मोन्सवर आरोप करणे शक्य आहे ! हलक्या पद्धतीने परिस्थिती हाताळल्यास आणि थोडी विनोदी भूमिका घेतल्यास तुम्ही तुमच्या मेंदूतला हा बदल एन्जोय करू शकाल.

६. मदत घ्या.

गरोदर असतांना तुम्हाला सगळ्यात जास्त गरज कोणाच्यातरी मदतीची असते. तेंव्हा जेंव्हा कोणी तुम्हाला काही मदत करु इच्छित असेल तेंव्हा त्यांची मदत घ्या. काही काळासाठी इतर गोष्टींकडे तुम्ही दुर्लक्ष केल्यास काही फरक पडणार नाही. ज्या गोष्टी गरजेच्या आणि महत्वाच्या आहेत त्यांच्याकडे लक्ष द्या. बाकीच्या गोष्टींची काळजी घेण्यासाठी इतर व्यक्ती असतात. तुम्ही ताण न घेतल्यास बाळाच्या विकासावर चांगला परिणाम होईल. काही गोष्टी विसरत असाल तर त्यासाठी इतरांची मदत तुम्ही घेऊ शकता.

७. तयारी ठेवा.

गरोदरपणात किंवा नंतर तुमच्याकडून काही छोट्या मोठ्या चुका होऊ शकतात. यात काळजी करण्याचे कारण नाही. तुमचे बाळ आल्यानंतर त्या हुशार बाळाची हुशार आई तुम्ही होणारच आहात ! तुमचा मेंदू पूर्ववत होणार आहे. परंतु तत्पूर्वी काही लहान-सहान चूक तुमच्याकडून झाल्यास त्यांसाठी तयार रहा. तुमच्यातील हा बदल माहित असणे तुम्हाला उपयोगाचे ठरेल.   

Click here for the best in baby advice
What do you think?
0%
Wow!
0%
Like
0%
Not bad
0%
What?
scroll up icon